وانزل بروحك ف المظاهرة هتاف جديد

[ندعوك للتسجيل في المنتدى أو التعريف بنفسك لمعاينة هذه الصورة]


وانزل بروحك ف المظاهرة هتاف جديد


طبق ف جيبك ورقه فيها الاسم والتليفون

سلم على اخواتك وأمك..

شد من شفايفها دعوة وحطها ف روحك

وانزل..

ارمى ع الشارع عينيك..

واحضن أغانى الذكريات

وافتكر لعبك هنا.. لعبك هناك

الكورة لما ساعات كتير كانت بتطلع تجرى ع الدكان

ويبرق البقال عينيه ويحلف ما انتوا واخدينها

وف الآخر بتطلع جرى م البلكونة "أمك"

وتقولّه طب معلش فيسامح

افتكر له حاجات كتيرة كان جدع فيها

علبة سجاير شكك

فوارغ الكوكاكولا اللى انت دايما بتنسى ترجعهاله تانى

جنيه فضة أخدته منه الصبح..

وانت معاكش ولا مليم تروح الشغل

افتكر له كل حاجة جميلة جدا واحضنه

يمكن تكون المرة دى المرة الأخيرة..

ومش هتلمح ضله تانى

المكوجى سلم عليه..

وانسى القميص اللى اتحرق من أسبوعين

واضحكله من قلبك قوى

بنت الجيران اللى انت قلبك تحت شباكها بقاله 3 شهور

مطرب وبيغنيلها أغنيات "حليم"

طبق ف جيبك ورقة فيها الاسم والتليفون

وخلى روحك تكنس الشارع..

وتلم كل الذكريات..

رغى البنات على كل عتبه ف كل بيت

وانزل بروحك ف المظاهرة هتاف جديد

و نشيد ومولوتوف وبضمير..

إنده على الشُهدا


قصيدة أحمد الخدرجى