شهرزاد
Admin
عدد المساهمات : 5700
تاريخ التسجيل : 05/03/2013
 | | موضوع: طلقنى شكراً ... الإثنين مايو 27, 2013 3:07 pm | |
| [ندعوك للتسجيل في المنتدى أو التعريف بنفسك لمعاينة هذه الصورة] لأحد 26-05-2013 [ندعوك للتسجيل في المنتدى أو التعريف بنفسك لمعاينة هذه الصورة] نهال عهدى * خلاااااص تعبت.. مابقتش قادرة أتحمل.. حياتى معاك ذل وعذاب ومهانة.. أيامى بقت شبه بعض، كلها سودة. * نسيت طعم الفرح، وخاصمنى النوم، وإذا جانى يكون بكابوس لأنك فيه. بأنام وأصحى على صورتك، تسد النفس، كلامك كله شخط ونطر، مفيش وعد بتوفى بيه، ولا كلمة يصونها العهد. * أعترف أنى غلطانة لأنى صدقتك وصدقت علامة الصلاة على جبينك والسبحة اللى ما تفارق إيدك، وإنك تخاف الله فى بيتى وعرضى ومالى وولادى، وتحافظ على اللى سابهولى أجدادى، أتارى كل دا كان كدب، والكدب دا طبعك وطبع عشيرتك وأصحابك. * كتير خوّفونى منك، قالوا لى مالوش أصل، ولا جدر أصيل فى الأرض، ولا عيلة ولا مركز، ولا صورة ولا هيبة، وإنك عمرك ما حبيت ولا هتحب، ملوش رأى، عايش تابع لأسياده وإخوانه تحت الأرض، قالوا جدوده كانوا عصابة تعيث فى الأرض بكل فساد لحد القتل. قالوا لى الأرض مش أرضه، وعايز يمتلك أرضك، يبيع فيها كده بالشبر باسم الرب، قالوا لى ليه صاحب شاطر ممشيه حروف على السطر، لا يقدر قدامه يكون كلمة ولا معنى وهو اللى غواه بيكى وقال له اتجوزها هتنفعهم وتنفعنا. * قالوا لى كتير مصدقتش، وكنت بأعانى من قبلك، مع إنى بنت أصول، ومن عيلة، وجدى بنا لى الهرم وشق قناة وعلّى السد، وساب لى ثروة تكفى بلاد، وقال لى إنتى محفوظة فى أعلى كتاب. * مصدقتش وقلت إزاى يكون خاين وأنا شارياه، دا من طينى ومن دمى، وإذا عانى كتير قبلى، جايز يعقل، جايز يشبع، دا خيرى كتير ميخلصشى، وسمع عن عرسان لا من بلدى ولا دمى، فرنساوى وإنجليزى وعثمانلى، عدوا بحور وجابوا مهور، وما قدروا يمسوا شعرة من راسى، طردهم أهلى وناسى. * أنا الحرة وبنت الناس، آخر صبرى يكون إنت، بقيت فرجة فى كل مكان، كلامك كله كدب وفشر، وأغلبه يكون تلقين. بتحضنى كده إزاى وفى إيديك كل دى سكاكين؟ مفيش حاجة نافعة معاك، خلاص صبرى فاق الحد. * أجيبلك صورك القديمة تفكرك نفسك، ولاّ انت خلاص نسيت أصلك. دلوقتى بقيت ساكن قصرى، وراكب عربيات بالكوم، وماشى فى وسط حراسك لكن خايف، واخدهم حتى فى الجامع؟ * كل يوم فى طيارة، رحت، رجعت، بخسارة، لا عارف تقول كلمتين على بعض، وضحّكت علينا طوب الأرض. * قالوا عليك دا وشه نحس، يجيب الفقر، وأنا صابرة، أقول بقالنا شهور، جايز يعقل، جايز يفهم معنى الجواز ببنت أصول، لكن إنت غشيم مغرور، وأهلى خلاص رموا طوبتك، وقالوا مفيش أمل فيك، تمردهم بقى معلن، فبسرعة كدا اخلع ومن نفسك بدل ما الدم يبقى بحور. * أنا بأعلنها كده على الناس، أنا غلطانة، أنا ندمانة، وأستاهل، لكن الحرة ماتتغلبش، هاخد حقى وأعيش حرة، وآخر مرة هاقولها لك، طلقنى وخد أهلك وروح مشكور. | |
|
