[ندعوك للتسجيل في المنتدى أو التعريف بنفسك لمعاينة هذه الصورة] ياغالية إنقاذنا بس فى إيدين ولادنا العفية يا عم يا خباز اخبزلى رغيف منك هدية
آكل به الفول يوم وأغمس به الطعمية
أنال رضا زوجتى تغيب زعابيها شوية
ياما سألتنى الرغيف ده جايبه من ورشة
مسامير خيوط وزلط ينفع صبة السقفية
ياستى كلى ربنا هيسترها معاك ياسعدية
زغرتلى وقلبت زى أمشير آه بقت نكدية
قالتلى أبعد عنى متلمسنيش ليه ياعسيلة؟
قالتلى حظى مهبب فيك يا أبو عقل مهلبية
شاطر تشترى خضار بهرمون خدل رجليه
أسلم على خالى وأقوله إزيك يا ست سنية !
إللى زود الطين بلة جبتلى مية م الحنفية
فيها مخاليق غريبى حاجات بتبصلى بحنية
قالتلى اشرب دى مية أحسن من المعدنية
قلتلها معدنية إيه خلينا على مقاس المهية
قالتلى ميلادها بدر ينور فى أول كل شهريتة
قلتلها غدر بالامانى وخوف من الخضارجية
يتولد فى أول النهار نلطم عليه فى العشية
يبقى لا رغيف ولا خضار حتى كمان المية
بالذمة دى تبقى عيشة ياهو دى عيشة ردية
قلتلها صبرا جايلنا حالا مشروع النهضوية
تفتحى الحنفية تنزل شوربة لنا كلنا ياولية
ورغيف تحلفى عليه ما شوفتى الخيبة دية
يا جبهة الإنقاذ إحنا ارتكبنا فى حقكم معصية؟
مراتى بتقوللى كلامكم فى هيصة وغوغائية
زى إعلانات رجوع الشباب نصب وملوخية
فين خطة الإنقاذ فين منكم سلوكيات الوطنية
فين إنكار الذات منكم فين الشهامة المصرية
فين محاربة الفساد فين التصدير للأوربية
فين التجرد من الهوا والمصالح الشخصية
فين العمل والتعلم من التجربة المهاتيرية
ياغالية إنقاذنا بس فى إيدين ولادنا العفية
نسمع زغاريد المكن وسواقى ترفع المية
نرجع الاحتياطى نسد بعرقنا عجز الميزانية
وينهض اقتصادنا ويبقى الجنيه مية مية
نصر فتحى اللوزى
[ندعوك للتسجيل في المنتدى أو التعريف بنفسك لمعاينة هذه الصورة] 
الرئيسية 
