Admin
Admin
عدد المساهمات : 1147
تاريخ التسجيل : 05/02/2013
 | | موضوع: دى البداية ودى النهاية. . كل قصة وليها غاية الإثنين مارس 18, 2013 1:37 pm | |
|
كل شىء أصبح سراب. . ماحنا عايشين ف الضباب
والخداع ليه ألف باب.. والعجوز غلب الشباب!
كل شىء أصبح كئيب.. والعدو بدل الحبيب
والمريض عالج الطبيب.. والصبى بلغ المشيب!
كل شىء أصبح بليد.. وأسمو بيفوت ف الحديد
والضعيف شبه الشديد.. والنفاق أصبح مفيد!
كل شىء أصبح كلام.. أى تثبيت والسلام
والمرعوش أصبح همام.. والزنديق أصبح إمام!!
كل شىء أصبح هلام.. والراجل شبه المدام
والشيوخ سبقو الإمام.. والحقيقة ف المنام!
كل شىء أصبح مرار.. والبرئ له تار وعار
والبرودة فيها نار. . والشجاعة ف الفرار!
كل شىء أصبح هزار. . جوه ديسكو جوه بار
ناس ف جنة وناس ف نار. . والشياكة ف الانتحار!!
كل شىء بالإنجليزى. . حتى نومنا يا عزيزى
زى لبنى وزى زيزى.. ضحكهم بالإنجليزى!!!
كل شىء بالأمريكانى. . والبكى وحتى الأغانى
منهم بتوه المعانى.. وإللى يفهمها يعانى
كل شىء أصبح "ستايل".. لبسنا وحتى وحتة "موبايل"
صورة سافلة جوه "فايل".. أو بيكينى ف شط "نايل"
المدير لابس "فانلة".. والبدل "أسلن"
الاجتماع بقى هاى يا شلة.. والشناكيت أكبر أدلة
توتو عامل "بونى تيل".. لو كشفتو تلاقى ديل
لو لمستو ما فيهش حيل.. لو عيط هـتلاقى سيل
نونو عامل فورمة فانكى.. وبيفطر "كيت كات وشانكى"
أسمو ع الفيس بوك "ذا منكى".. اسمو كامل "فانكى مانكى"
هيص وخش ف أحلى عيشة. . دوس ف بيره دوس ف شيشة
لف بانجو أو حشيشة.. عاكس واحدة لابسه بيشة!!
أنت عارف أنا أبقى مين؟ ولا خالتى تبقى مين؟
ولا طنط ميكى مين؟ ولا سالك أنهى دين؟!!!
كل شىء عندو "فشيخ". . أى أراجوز ف التاريخ
أو دى رنجى أو فسيخ. . أو دى كفته جوه سيخ
يع يع على "التبيخ"
كل شىء ف حياتو كاب.. شىء مغطى ع الهباب
أو مسرّح باللعاب.. أو جيل بدهن الكباب
كل شىء ف حياتو جينز. . أصلو راكب حته بنز
واد لذيذ يعرف يهز.. غور يا ابن المستفز...
كل شىء أصبح وسايط.. الاتكال بقى ع الوسايط
والهلفوت مبسوط وزايط.. والمسكين مقهور وشايط !
كل شىء يسهل برشوة. . ألف ميه جوه حشوه
أو كام سفرية وعشوه.. بيها توصل أحلى نشوة. ..
كل شىء لو يبقى مادى. . ها تعيش عيشة لونها وردى
ولمشكلتك حل عندى.. خد من عندى ألف جندى...
كل بلطجى ف المدينة. . ماشى يتسنكح علينا
ياخد كل اللى ف إيدينا. . والسياسة جنت علينا...
كل شىء ضل الطريق.. والطريق عمّال يضيق
والطريق ما فيهوش رفيق. . م الشياطين كمل الفريق
كل شىء أصبح خداع.. والصديق راح خان وباع
وشيخ طريقة الابتداع.. قضّى عمره ف المتاع
كلو صاحب ف المصالح. . ف الخصام تلاقيه يصالح
ف الخداع والغش فالح. . كلو لعيون المصالح
كل شخص وله مطامع.. وف فلوسك بس طامع
أوعى تلقاه مرّه طالع.. وتناديلو بحسن طابع
كل شىء أصبح خيال.. تاه ف ضلو ألف بال
والواقع أصبح وبال.. يحدفك أسوأ مآل
كل شىء أصبح مؤامرة. . والفاتح ليه بشرة سمرة
البيضة سيبها لونها حمرة. . والعصير والله خمرة !
كل شىء بالهرمونات.. حتى عيشنا والفتات
داحنا عايزين معجزات. . حتى لو ناكل رفات !!
ميه بشرب ولا جاز؟ والهوا مشبع بغاز
والكون بيعانى احتباس. . واللى يهرب يبقى فاز !!
كل شىء من جوه فاضى. . حتى ذمة ألف قاضى
والمزور شخص عادى.. والظلام أصبح رمادى !!!!
كل حى وكل حته. . البرئ يجيئه بس سته
والباقيين من جوه عته. . م الحرام كلو طشت فته
كلو رايح جوا جيبو. . لو نهب وبيجرى سيبو
م الحرام أخد نصيبو. . وماحدش يقدر يعيبو!!!
ثانية واحدة تبقى ساعة. . حتى ف قناة الإذاعة
ولا كشك ولا باعة. . والألوان برا الطباعة !!!
كل شىء بقى لونه باهت. . والمعانى الحلوة تاهت
والوجوه الصادقة شاحت. . والجواهر عمله ساحت. ..
كل شىء ف الدنيا فانى. . حتى خطّى والمعانى
منى ليك أجمل تهانى. . لما ف حياتك تعانى
دى البداية ودى النهاية. . كل قصة وليها غاية
واحكيلك مليون حكاية. . بس لو تفضل معايا. ..
محمد عوض محمود
| |
|
