شهرزاد
Admin
عدد المساهمات : 5700
تاريخ التسجيل : 05/03/2013
 | | موضوع: إحنا شعب متخلف، لازم ندرك دا علشان يبقى عندنا أمل فى التحسن الجمعة يونيو 07, 2013 2:20 pm | |
| [ندعوك للتسجيل في المنتدى أو التعريف بنفسك لمعاينة هذه الصورة] 7/6/2013 خالد البرى أن تسمى الأموال فلوسا، جمع فلس، المشتقة من «ف ل س»، التى منها الفعل أفلس، أى فقد أمواله، فهذا يعنى شيئا من اثنين: إما البعدا عبط، أو أن النكد والطيرة والتشاؤم متمكنة من ثقافتهم جدا لدرجة أنهم لا ينظرون إلا إلى حضيض المصير بالنسبة إلى هذا «المال». ينظرون أموالهم «الفلوس» فيتذكرون فورا «الفلس». أو أنهم يرضون «جهة ما» ويطمئنونها إلى أنهم ناويين يفلسوا، وأبدا أبدا لن يكنزوا المال. ٢فلوس كلمة عربية، استغنى عنها كثير من العرب لصالح كلمة مصارى «المشتقة من مصر»، لكن أهل مصر أصروا على فلوس. ٣ثم إن العرب حين غزوا تبليسى «عاصمة جورجيا الحالية» اختاروا للبلد اسم «تفليس». طبعا السبب اللغوى معروف لمن عندها علم بموضوع قلب الباء فاء، والفاء باء، فى اللغة العربية وغيرها من اللغات. لكن حين رأيت النقود التى صكوها هناك، رأيتها فى المتحف البريطانى، قلبى اتقبض. عملة معدنية كبيرة مكتوب عليها بالخط العريض «تفليس». الملافظ سعد. ٤مصر هى أمى - نيلها هو دمى - شمسها ف سمارى - شكلها ف ملامحى - حتى لونى قمحى - لون خيرك يا مصر. (علشان تفهمى اعتراضى على مدح القمح لازم تشوفى الفقرة «٥»). هتقولى لى ما فيه أوحش من كده، إيه اللى موقفك عند الأغنية دى؟ هقول لك أيوه. علشان كده المثال دا عزيز على ودنى. لأنه مثال لـ«الكيتش»، السيئ الجيد، أى السيئ الذى حاز «قيمة ما» جعلته ينتشر ويصير مقبولا. بذمتك ودينك يا شيخة اقرى الكلام دا تانى. هل فيه فرق كبير بينه وبين «الحب الحب، الشوق الشوق». مع ملاحظة إن «الحب الحب، الشوق الشوق» مقصود بيها السخرية. مش عايز أقلب لك معدتك ونروح على «عشة جنب نيلها تسوى ألف قصر»، علشان هقول كلام يعاقب عليه القانون. وممكن أغنى لك «المصريين أهمه». وأسهم فى نشر الأكاذيب دون أى وخز من ضمير. ٥شفتى فيلم من الأفلام الصامتة؟! أو حتى فيلم من الأفلام الحديثة اللى بتدور أحداثها فى بدايات القرن العشرين لما السيارات كانت جديدة؟ أكيد. لاحظتى حاجة؟!الناس كانت بتقف على الرصيف، تبص لو فيه عربية جاية، لو مافيش عربية بتعدى الشارع. نفس الطريقة اللى احنا بنعدى بيها الشارع حاليا، مع فرق وحيد. إن العربيات وقتها كانت قليلة جدا، عربية بتعدى كل خمس دقايق مثلا. إنما العربيات دلوقتى كتيرة. المشهد دا بيلخص لى حالتنا. إحنا فى الحقيقة كائنات من زمن سابق. الآلات بتتطور حواليها، فبنتعرف على الزمن الجديد بآلاته. التفكير البشرى اللى اخترع من زمان التخطيط والتنظيم المرورى، محودش علينا. مدننا قرى طالع لها عمارات. أيوه، ولسه بنغنى للقمح على إنه «خير مصر»، مع إننا بنشحته من الدنيا كلها. إحنا قدااااااااام أوى (جمع قديم) . ?Is'n it Ironic على رأى الست ألانيس موريسيت. ٦أما ختامها فشايله للجملة اللى هتشلنى، هتشلنى. الأخ خالد يوسف المخرج بتاع السينما والثقافة بيتكلم عن حاجة اسمها «الجين المصرى العبقرى». الجين الإيه؟ الجين المصرى؟ دا فين دا؟ يعنى بالهندسة الوراثية ممكن ألعب فى جين أحقق به للأستاذ مصطفى كامل أمنيته لو لم يكن مصريا؟ هتقولى لى يعنى إنت وقفت عند الجين المصرى، ومالفتتش نظرك «العبقرى»؟! هقول لك لأ. فيه حاجات فى الدنيا مايتردش عليها. كفاية الكلمتين اللى كتبتهم فوق. أنا عايز أعيط. الشعوب اللى بتعمل كده عمرها ما بتتنقل من مكانها. إحنا شعب متخلف. اكتبى فى الكراسة ١٠٠ مرة، إحنا شعب متخلف، إنسانيا وحضاريا وقيميا وعلميا وأخلاقيا. لازم ندرك دا علشان يبقى عندنا أمل فى التحسن. | |
|
