- الله الله.. اشجينى يا سيدى.. هات ما عندك
- هذه هى مكالمات مرسى رئيس مصر المعزول مع أيمن الظواهرى.
- جميل.. هو ده الكلام ولّا بلاش.. من قام برصد تلك المكالمات؟؟؟
- ودى عايزة كلام.. جهتان لا ثالث لهما: المخابرات المصرية، أو الأمن الوطنى...
- عفارم عفارم.. رصدوها إزاى؟؟؟؟؟؟
- إنت غبى يا أيها الكاتب أم عميل أم تشكك فى أجهزة أمن بلدك. المخابرات وأمن الدولة بيعرفوا دبة النملة. ناس شغالة.
ناس فى عز الحرب ضدهما والتشكيك فيهما كانوا يسهرون على أمن بلدك،
وعلى أمنك أنت شخصياً. ناس وطنيين مفيش كلام..
- ليس هذا ما أقصد.. أنا أتكلم عنهما كجهتين أمنيتين رفيعتى المستوى..
هل يجوز لهما التجسس على رئيس الجمهورية..
- ليس تجسساً يا بنى آدم.. دول ناس بيشوفوا شغلهم، وعرفوا ما يدور بين مرسى وبين زعيم تنظيم القاعدة،
ولا تنسى أن مرسى لديه ملف قضية تخابر قديم.
- تمام تمام.. طب هو حضرتك كيف ترشح للرئاسة بهذا الملف، وكيف يحكمنا جاسوس.
أنا لسانى دلدل وكتبت أيام مرسى فى نفس هذا المكان مقالاً بعنوان: هل الرئيس مرسى جاسوس؟؟، ولم يرد أحد..
- طبعاً جاسوس.. وبعدين أنت تريد منهم أن يتركوا ما وراءهم ويردوا على تلك المقالات التافهة الخبيثة التى ينشرها معدومو الشرف
والنزاهة والوطنية الحقة أمثال حضرتك
- سيادتك لم تجبنى.. هل يعنى هذا أنهم كانوا يتجسسون على رئيس الجمهورية؟؟
- سيادتك ما بتفهمش.. قلنا إنه أصلاً جاسوس، وبعدين افرض يا أخى إنهم سمعوا مكالمة أيمن الظواهرى
ووصلوا أن المتحدث معه هو مرسى.. ألن يكملوا شغلهم لمجرد أنه رئيس الجمهورية.. يطلع منها عادى كده؟؟
- لأ حلوة.. فاتتنى دى. طب حضرتك هل هذا الأمر خاص بأيمن الظواهرى فقط، أم بكل مكالمات مرسى؟؟
- وانت مالك؟؟ انت ليك بإن هؤلاء ناس بيحبوا بلدهم ويحافظوا عليه ولن يسمحوا لأى شخص أياً كان بأن يسلم البلاد لأعدائها.
- جميل جداً.. يعنى أفهم من كده حضرتك أن المخابرات وأمن الدولة كانوا يتجسسون على حسنى مبارك لحماية أمن هذا الوطن؟؟
- مش بقول لك انت خبيث ومنافق وكلب حقير.. تحاول دس السم فى العسل..
وبعدين هل تساوى مبارك بمرسى يا بنى آدم؟؟
- يا فندم أنا بس أسأل.. المخابرات وأمن الدولة يعرفوا دبة النملة، لكنهم حتى الآن لم يقدموا أدلة قتل الشهداء،
وكاميرات المتحف المصرى اتمسحت من عليها تسجيلات التحرير بقدرة قادر وقت موقعة الجمل،
والكلام الذى كان ينشر عن مبارك بعد الثورة قريب جداً مما ينشر الآن على مرسى مع اختلاف المستوى،
لأن الأول كانوا يتكلمون عن فساده والثانى يتكلمون عن خيانته، والنتيجة أن الأول بعد كل هذا الكلام تعاد محاكمته،
والثانى يحاكم من الأول وجديد، فما المانع من أن يخرج براءة هو الآخر أو تعاد محاكمته؟
- لابساه لابساه.. الناس دى كانت تواصل الليل بالنهار للحفاظ على الوطن..
- أيوه وهما ماواصلوش الليل والنهار ليه أيام مبارك و25 يناير، وماواصلوش الليل والنهار
ليه عشان يمنعوا من يقولون عنه إنه جاسوس من حكم مصر؟؟
- انت هتقول لى 25 يناير والكلام الفاضى ده.. ما خلاص الإخوان هما اللى لعبوها وعملوها..
- ما هم لو لعبوها وعملوها ودى مش ثورة، يبقى المخابرات وأمن الدولة كانوا نايمين على ودانهم
ولازم يتحاسبوا عن تقصيرهم اللى خلى الثورة تحصل..
- تانى هتقول لى ثورة.. الثورة هى 30 يونيو مش 25 زفت اللى ركّبت الإخوان..
- ما هى 25 زفت لو ركّبت الإخوان يبقى عشان المخابرات وأمن الدولة كانوا بيلعبوا..
- انت عايز إيه يعنى فى ليلتك اللى مش فايتة دى يا خاين ياعميل يا إمعة.. نرجعلكم الإخوان يا كلاب يا خرفان يا مرتزقة،
ولّا نلغيلكم المخابرات وأمن الدولة ويبقى الدم للرُّكب فى الشوارع وتتقلب سوريا يا نيلة انت.. عايز إيه؟؟
- عايز سلامتك.. انت عامل إيه؟؟؟؟؟؟؟
الرئيسية 
